Өз қалаңды таңда: X
Намаз уақыты:
  • 16
  • қараша

    сенбі

  • 18
  • Раби́’у ль-авваль

    1441

АҚМОЛА ОБЛЫСЫНДА ЖАҢА БАС ИМАМ ТАҒАЙЫНДАЛДЫ (ФОТО)

ҚМДБ-ның төрағасы, Бас мүфти Ержан қажы Малғажыұлының бұйрығымен Ақмола облысында бас имам ауысты.


Ақмола облысында тоғыз жыл өкіл имам болып еселі қызмет еткен Қанат қажы Қыдырмин елордадағы еліміздің басты діни-рухани орталығы  – Әзірет сұлтан мешітіне наиб имам болып бекітілді. Қасиетті жұма намазы күні ҚМДБ-ның Наиб мүфтиі, Әзірет сұлтан мешітінің бас имамы Серікбай қажы Ораз осы тағайындауларды жамағат алдында жария етті.


Көкше жұрты да осында бас имам болып істеген Қанат Қыдырминге ерекше ықылас танытып, ризашылық білдірді. Жамағат атынан елге танымал азаматтар Мұрат қажы Ыдырысов пен Болат Жанәділов ізгі тілектерін айтып, жол сапар тіледі. Көкше жұртының атынан иығына жапан жауып, жеңіл көлікті сыйға тартты.


Қанат Қыдырмин елге деген алғыс сөзінде өзіне қолдау білдіріп, асыл дінімізді насихаттауға үлес қосқан барша қауымға жүрек тебірентер лебізін жеткізді. Осы еңселі мешіттің Алланың асқақ кәләмін насихаттаудың қастерлі ошағына айналғанын айта келіп, өзіне жапқан шапанды күн сайын азан үнімен жұртты ұйытқан мешіт азаншысы Алтынбек Аманжоловқа, ал, жеңіл көлікті мешіттің тазалықшысы болып еңбек ететін жалғызбасты ана мен оның отбасына тарту етті. Бұл да пайғамбар өнегесі екенін шынайы ізгілікпен паш етті.


Ақмола облысының жаңа бас имамы болып Астана қаласында орналасқан "Әлжан ана" мешітінің бас имамы қызметін атқарған Қуаныш Жұмабайұлы Сәбит тағайындалды. Ол бұрынғы Көкшетау облысына қарасты Уәлиханов ауданының Қайрат ауылында дүниеге келген. Жоғары діни білімі бар. Соңғы жылдары Паң Нұрмағамбет атындағы Степногорск қалалық мешітінде бас имамдық қызмет те атқарған еді.

Наиб мүфти Серікбай қажы Ораз жаңа имамды таныстырғасын оған жаңа қызметте табыс тіледі.

Ақмола облыстық «Науан Хазірет»

мешітінің баспасөз хатшысы

Бақыт Смағұл




Пікірлер (0)

Тіркелген қолданушылар ғана пікір қалдыра алады. Сондықтан, сізге сайтта тіркелуіңізді немесе құпиясөзді қолданып, кіруіңізді ұсынамыз.